ຈຸງານ ປະຕິບັດລະບຽບການ

ຈຸງານປະຕິບັດລະບຽບການ

I. ສະພາບລວມ

ຈຸງານຈັດຕັ້ງປະຕິບັດລະບຽບການແມ່ນຈຸງານໜື່ງທີ່ສຳຄັນໃນການປົກປັກຮັກສາ ຊັບພະຍາກອນທໍາມະຊາດ, ສັດນໍ້າ – ສັດປ່າ, ຊີວະນາໆພັນ ແລະ ຖີ່ນທີ່ຢູ່ອາໄສ ໃນເຂດ ອຸທິຍານ ແຫ່ງຊາດ ນາກາຍ-ນໍ້າເທີນ (ກອຊ-ນທ) ໂດຍສະເພາະແມ່ນເນັ້ນໃສ່ຮັກສາຊະນິດພັນສັດປ່າໃກ້ສູນພັນສະເພາະຖິ່ນສາຍພູຫລວງ, ໃຫ້ຄຽງຄູ່ກັບຄວາມຢູ່ດີກິນດີໃນໄລຍະຍາວຂອງປະຊາຊົນໃຫ້ມີຄວາມຍືນຍົງພ້ອມດຽວກັັັນນັ້ນຈະຕ້ອງໄດ້ຮັບການຈັດຕັ້ງປະຕິບັດກົດໝາຍຢ່າງຢ່າງຕັ້ງໜ້າ ແລະ ມີປະສິດຜົນ. (1) ຮັກສາປະຊາກອນສັດປ່າສະເພາະຖິ່ນສາຍພູຫລວງ ແລະ ຊະນິດພັນອື່ນໆໃນເຂດແຫລ່ງນໍ້າໆເທີນ 2 ທີ່ພວມຕົກຢູ່ໃນສະພາບຖືກໄພຂົ່ມຂູ່ໃນລະດັບຊາດ ແລະ ສາກົນ. ໂດຍການລາດຕະເວນຈະແກ້ໄຂ ແລະ ສະກັດກັ້ນການລ່າສັດລວມທັງໄພຂົ່ມຂູ່ອື່ນໆ. ກິດຈະກໍາ ການຈັດຕັ້ງປະຕິບັດກົດໝາຍທີ່ມີປະສິດທິພາບ, ໂດຍມີການເຂົ້າຮ່ວມຢ່າງເຕັມສ່ວນຂອງຊຸມຊົນທ້ອງຖິ່ນ ແລະ ສຸມໃສ່ໃນສາມເຂດບູລິມະສິດດ້ານຊີວະນາໆພັນ(ທົ່ງກາແຈງ/ເຂດນໍ້າມອນຕອນເທິງ, ເຂດ ນໍ້າແຈ ແລະ ເຂດ ທົ່ງກວ້າງ/ທົ່ງເສັດ). (2.) ຫຼຸດຜ່ອນການລັກລອບລ່າສັດປ່າ ແລະ ການຄ້າຂາຍສັດປ່າ, ຕັດໄມ້ ແລະ ຂຸດຄົ້ນເຄື່ອງປ່າຂອງດົງທີ່ຜິດກົດໝາຍ ໂດຍການປັບປຸງການຮ່ວມມື ສາກົນກັບປະເທດເພື່ອນບ້ານ ແລະ ເພີ້ມທະວີການກວດກາລາດຕະເວນຕາມແນວຊາຍແດນລາວ-ຫວຽດນາມ ໂດຍທະຫານຊາຍແດນ. ຢ່າງເຂັ້ມງວດ. (3). ປັບປຸງປະສິດທິພາບວຽກງານການຈັດຕັ້ງປະຕິບັດລະບຽບການ ແລະ ຖານຂໍ້ມູນໂດຍການນໍາໃຊ້ລະບົບ SMART, ເຊິ່ງເຮັດໃຫ້ ສາມາດຕິດຕາມໄດ້ເຖິງ ລະດັບຄວາມພະຍາຍາມ ແລະ ໄພຂົ່ມຂູ່,  ສາມາດ ປະເມີນຜົນການປະຕິບັດ ແລະ ວັດແທກຄວາມຄືບໜ້າເພື່ອກ້າວໄປສູ່ການບັນລຸໄດ້ຕາມ ຈຸດປະສົງ ແລະ ເປົ້າໝາຍ. (4). ປັບປຸງປະສິດທິພາບຂອງການປະຕິບັດລະບຽບການທີ່ມີປະສິດທິພາບ ໂດຍການເສີມສ້າງຄວາມອາດສາມາດ ຂອງ   ໜ່ວຍງານທີ່ກ່ຽວຂ້ອງ ໃນການສືບສວນ, ການດຳເນີນຄະດີ ແລະ ການຕັດສິນລົງໂທດ ຜູ້ກະທຳຄວາມຜິດ ກ່ຽວກັບ ສັດປ່າ ແລະ ປ່າໄມ້ໃຫ້ປະສົບຜົນສຳເລັດ. (5).​ ກັ່ນຕອງ ແລະ ປັບປຸງວຽກງານການລາດຕະເວນ ແລະ ດ່ານເພື່ອຕອບສະໜອງຕໍ່ ການປ່ຽນແປງອັດຕາການພົບເຫັນເຫດການ ໃນຂະນະທີ່ຍັງມີ ການລາດຕະເວນໃຫ້ຄວບຄຸມທົ່ວເຂດອຸທິຍານເພື່ອຕອບສະໜອງໃຫ້ບັນລຸຕາມເປົ້າໝາທີ່ວາງໄວ້.ເພື່ອໃຫ້ບັນລຸຕາມຕົວຊີ້ວັດດັ່ງກ່າວ ຫົວໜ້າຈຸງານ ຫຼື ຄະນະກອງຜູ້ຊີ້ນໍາ-ນໍາພາ ຈະຕ້ອງຮັບຜິດຊອບຕິດຕາມພະນັກງານຂອງຈຸງານ, ມີຄວາມເດັດຂາດ ມີສິດໃນການການຕັດສິນໃຈ, ວຽກງານວິຊາການ ແລະ ການປັບປຸງບຸກຄະລາກອນໃນໜວ່ຍງານທີ່ຕົນເອງຮັບຜິດຊອບໃຫ້ເດັດຂາດໂດຍການຂໍທິດຊີ້ນຳ ແລະ ລາຍງານໃຫ້ຂັ້ນເທີງເປັນໄລຍະ ນອກຈາກນັ້ນຍັງຈະຕ້ອງໄດ້ປັບປຸງລະບົບກວດກາລາດຕະເວນໃຫ້ແທບເໜາະ ແລະ ມີປະສິດທິພາບ. ຊັບຊ້ອນບຸກຄະລາກອນເຂົ້າປະຈຳແຕ່ລະເຂດ, ໜ່ວຍງານ ຕາມຄວາມເໝາະສົມຕາມໂຄງຮ່າງການຈັດຕັ້ງກວດກາລາດຕະເວນ. ສ້າງ ແລະ ປັບປຸງລະບຽບການຄຸ້ມຄອງ ກອຊ.ນທ ໃຫ້ສຳເລັດ ແລະ ທັນກັບເຫດການ, ສ້າງ ແລະ ປັບປຸງຍຸດທະສາດ ການປະຕິບັດການຈັດຕັ້ງປະຕິບັດລະບຽບການຂອງສົກປີ 2022-2026 ໃຫ້ໄດ້ຮອງຮັບຈາກພາກສ່ວນທີ່ກ່ຽວຂ້ອງ ຫຼັງຈານັ້ນຈິ່ງ ສ້າງ ແລະ ປັບປຸງຄູ່ມືດ້ານການຝຶກອົບຮົມເຕັກນິກການກວດກາລາດຕະເວນປ່າ, ດ່ານກວດກາ, ທິມເຄື່ອນທີ່, ການຕິດຕາມ ແລະ ປະເມີນຜົນສະເພາະວຽກກວດກາລາດຕະເວນ ຂອງແຜນດໍາເນີນງານໄລຍະເວລາ ທີ 04 (SEMFOP 4) ປັບປຸງທົບທວນບົດບັນທຶກ(MoU)ກັບຄູ່ຮ່ວມງານຄືນໃໝ່ໂດຍສະເພາະກັບທະຫານທັງສອງແຂວງ ແລະ ວາງແຜນຍຸດທະສາດສະເພາະໃນການສະກັດກັ້ນການລັກລອບຕັດໄມ້, ລ່າສັດ, ຖ່າງປ່າ ແລະ ເກັບກູ້ເຄື່ອງປ່າຂອງດົງ ໃນເຂດ ກອຊ ນທ ໂດຍເນັ້ນໃສ່  03 ເຂດເທີງໃຫ້ມີປະສິດທິພາບ ແລະ ຍືນຍົງ. ໃຫ້ຖືເອົາວຽກກງານໂຄສະນາປຸກລະດົມວຽກງານອານຸລັກ, ເຜີຍແຜ່ນິິຕິກໍາຕ່າງທີ່ກ່ຽວຂ້ອງທົ່ວເຖີງ, ສ້າງ ແລະ ປັບປຸງອາຊີບໃຫ້ໝັ້ນຄົງໂດຍສະເພາະ ນາຍຟານ, ຈັດສັນຄູ້ມຄອງເຄື່ອງປ່າຂອງດົງຕາມລະດູການ, ຮັກສາການນໍາໃຊ້ຊັບພະຍາກອນທໍາມະຊາດແບບຍືນຍົງ, ຫັນປ່ຽນການລ້ຽງສັດແບບທຳມະຊາດໂດຍກົງ 100% ມາສູ່ການການລ້ຽງໃນພື້ນທີ່ທີ່ສາມາດຄູ້ມຄອງໄດ້ຕາມຄວາມສາມາດ, ສ້າງເຂື່ອຄ່າຍຕະຫຼາດນັດຕາມລະດູການສ້າງລາຍຮັບທີ່ໝັ້ນຄົງໃຫ້ຊຸມຊົນພ້ອມຫຼຸດຜ່ອນຄວາມທຸກຍາກໃຫ້ສຳເລັດຕາມເງື່ອນໄຂມາດຖານເທື່ອລະກ້າວ. II. ເປົ້າໝາຍ. ສ້າງຊຸມຊົນໃຫ້ເປັນຕົວແບບໃນ 13 ບ້ານເປົ້າໝາຍໃນ 03 ເຂດທີ່ອາໃສຢູ່ໃນອຸທິຍານແຫ່ງຊາດໃຫ້ເປັນເຈົ້າການໃນການປົກປັກຮັກສາຊັບພະຍາກອນທຳມະຊາດ ປ່າໄມ້, ສັດນໍ້າ-ສັດປ່າ ແລະ ເຄື່ອງປ່າຂອງດົງ ຄຽງຄູ່ກັບການປົກປັກ ຮັກສາເນື້ອທີ່ການປົກຫຸ້ມ ຂອງປ່າໄມ້ ໄດ້ 86%. ແລະ ຮັກສາຊີວະນາໆພັນທີ່ສໍາຄັນສະເພາະຖິ່ນ ໂດຍເຂັ້ມງວດການປະຕິບັດລະບຽບການຢ່າງມີປະສິດທິຜົນສູງ ສາມາດຫລຸດຜ່ອນໄພຂົ່ມຂູ່ໃນເຂດອຸທິຍານແຫ່ງຊາດນາກາຍ-ນໍ້າເທີນໃຫ້ 70% ພາຍໃນປີ 2026. III. ຈຸດປະສົງ.

• ສ້າງບ້ານໃຫ້ເປັນຕົວແບບໃນ 13 ບ້ານເປົ້າໝາຍໃນ 03 ເຂດທີ່ອາໃສຢູ່ໃນອຸທິຍານແຫ່ງຊາດໃຫ້ເປັນເຈົ້າການໃນການປົກປັກຮັກສາຊັບພະຍາກອນທຳມະຊາດ ປ່າໄມ້, ສັດນໍ້າ-ສັດປ່າ ແລະ ເຄື່ອງປ່າຂອງດົງ ໃຫ້ໄດ້ 50% ພາຍໃນປີ 2026.
• ຫຼຸດຜ່ອນການລັກລອບລ່າສັດປ່າ, ຕັດໄມ້ ແລະ ເກັບກູ້ເຄື່ອງປ່າຂອງດົງທີ່ຜິດລະບຽບໃນເຂດຄູ້ມຄອງນຳໃຊ້ໃຫ້ໄດ້ 30%, ເຂດຫວງຫ້າມໃຫ້ໄດ້ 50% ແລະ ເຂດບຸລິມາສິດຮັກສາພັນສັດປ່າ ໃຫ້ໄດ້ 70% ໂດຍການເພີ້ມທະວີການປະຕິບັດລະບຽບການຢ່າງມີປະສິດທິພາບ ແລະ ກວດກາລາດຕະເວນຂອງຊຸມຊົນທີ່ມີປະສິດທິຜົນສູງ
• ຮັກສາປະຊາກອນສັດປ່າສະເພາະຖິ່ນສາຍພູຫລວງ ແລະ ຊະນິດພັນອື່ນໆໃນເຂດແຫລ່ງນໍ້າໆເທີນ 2 ໃຫ້ມີຄວາມສາມາດແຜ່ຜັນ ແລະ ເພີ່ມປະຊາກອນຂື້ນ 30%ໃນປີ 2026.

IV. ໂຄງຮ່າງການຈັດຕັ້ງ. ຈຸງານປະຕິບັດລະບຽບການ: ຈະປະກອບມີ ຫົວໜ້າ ແລະ ຮອງຈຸງານ, ທີ່ປຶກສາປະຕິບັດລະບຽບການ, ວິຊາການສະເພາະດ້ານ ແລະ ຜູ້ຊ່ວຍຖານຂໍ້ມຸນ (SMART), ຄະນະສະເພາະກິດ ຫຼື ທິມເຄື່ອນທີ່ພິເສດ, ຜູ້ທີ່ຮັບຜິດຊອບເຂດ, ກຸ້ມບ້ານ, ທະຫານ ແລະ ທີມລາດຕະເວນຂັ້ນບ້ານ.(ແຜນວາດ ໂຄງຮ່າງການຈັດຕັ້ງຈຸງານປະຕິບັດລະບຽບການ). V. ພື້ນທີ່: ອຸທິຍານແຫ່ງຊາດ ນາກາຍ-ນໍ້າເທີນ. ການກວດ​ກາ​ລາດ​ຕະ​ເວນ ເພື່ອ​ສະ​ກັດ​ກັ້ນ​ການ​ກະ​ທຳ​ຜິດກົດ​ໝາຍຂອງ​ທິມ​ງານໃນເບື້ອງຕົ້ນນີ້ ແມ່ນຈະໄດ້ສຸມໃສ່ສະເພາະສາມເຂດບູລິມະສິດເປັນຫຼັກໆ ໂດຍມີຈຸດປະສົງ​ສະ​ກັດ​ກັ້ນ ການລ່າສັດ, ໂດຍສະເພາະ ການໃສ່ແຮ້ວ ຕ້ອງໃຫ້ຫຼຸດລົງໄປໃນລະດັບທີ່ເຫຼືອໜ້ອຍທີ່ສຸດ ຫຼື ບໍ່ມີເລີຍພາຍໃນພື້ນທີ່ດັ່ງກ່າວ. ​ເມື່ອຈຸດປະສົງດັ່ງກ່າວຫາກບັນລຸຜົນ, ງົບປະມານ ແລະ ບຸກຄະລາກອນຫາກມີຈຳນວນເພີ່ມຂຶ້ນຕາມຄວາມຕ້ອງການ, ພື້ນທີ່ໃນການກວດກາລາດຕະເວນກໍ່ອາດຈະຖືກຂະຫຍາຍເພີ່ມຕື່ມອີກ. ອີງຕາມການແບ່ງເຂດອຸທິຍານ ຄວນແບ່ງຕາມດໍາລັດ 134 /ລບ, ລົງວັນທີ 13 ພຶດສາພາ 2015. ໃນ ມາດຕາທີ 08: ວ່າດ້ວຍການຈັດແບ່ງເຂດໃນປ່າສະຫງວນ. 1).ເຂດຫວງຫ້າມເດັດຂາດ. 2). ເຂດຄຸ້ມຄອງນຳໃຊ້. 3). ເຂດເຊື່ອມຕໍ່. 4). ເຂດກັນຊົນ ແລະ ນອກຈາກນັ້ນ ກອຊ.ນທ ຍັງອີງຕາມທ່າແຮງດ້ານຊັບພະຍາກອນ ທັງງົບປະມານ ແລະ ຈຳນວນພະນັກງານລາດຕະເວນທີ່ມີຢູ່ໃນກອງຄຸ້ມຄອງ ອຸທິຍານແຫ່ງຊາດ ນາກາຍ-ນໍ້າເທີນ, ການກວດກາລາດຕະເວນ ກໍ່ຄື ການຈັດຕັ້ງປະຕິບັດລະບຽບການ ໃນເຂດອຸທິຍານ, ໂດຍອີງຄວາມສຳຄັນຂອງຊີວະນາໆພັນ ຈິ່ງຈຳເປັນຈະຕ້ອງໄດ້ຈັດບຸລິມາສິດພື້ນທີ່ ອຸທິຍານແຫ່ງຊາດ ນາກາຍ-ນ້ຳເທີນ ອອກເປັນເຂດບຸລິມາສິດສຳຄັນດັ່ງນີ້: ເຂດ​ບຸ​ລິ​ມະ​ສິດ​ຊີ​ວະ​ນາໆ​ພັນ1 (PBA1) ເຂດ​ທົ່ງ​ກະ​ແຈງ/ເຂດ​ນໍ້າ​ມອນ​ຕອນ​ເທິງ, ເຂດບຸລິມະສິດຊີວະນາໆພັນ2 (PBA2) ເຂດ​ນໍ້າ​ແຈ/ຫ້ວຍ​ຕອງ/ຫ້ວຍ​ສະ​ນາບ ແລະ ເຂດບຸລິມະສິດຊີວະນາໆພັນ3 (PBA3) ເຂດ​ທົ່ງ​ກ້​ວາງ/ທົ່ງ​ແສດ. ທັງໝົດນີ້ແມ່ນນອນຢູ່ໃນເຂດຫວງຫ້າມເດັດຂາດ

• ເຂດຫວງຫ້າມເດັດຂາດ. ເຂດ​ຫວງ​ຫ້າມ​ເດັດ​ຂາດ(TPZ): ໃນເຂດນີ້ຈະລວມເອົາພື້ນທີ່ທີ່ຢູ່ໃນ ແລະ ນອກເຂດບູລິມະສິດ​ຊີ​ວະ​ນາໆ​ພັນ. ຫ້າມ​ເດັດ​ຂາດ​ບໍ່ໃຫ້ມີການ ລ່າສັດ ຫຼື ດຳເນີນກິດຈະກໍາ ​ດ້ານ​ກະສິກໍາໃນພື້ນທີ່ນີ້. ການເກັບກູ້​ເຄື່ອງປ່າຂອງດົງແມ່ນເຮັດໄດ້ຢ່າງຈຳກັດ ​ໂດຍ​ອີງຕາມລະບຽບສະເພາະຂອງ​ປ່າ​ສະ​ຫງວນແຫ່ງຊາດ​ (ຕົວຢ່າງ: ການເກັບນໍ້າເຜິ້ງປະຊາຊົນບ້ານໃດໜຶ່ງ ຕາມເວລາທີ່ກຳນົດໃນແຕ່ລະປີ).ໃນເຂດພື້ນທີ່ອຸທິຍານແຫ່ງຊາດ ນາກາຍ-ນໍ້າເທີນ ມີເນື້້ອທີ່ທັງໝົດ 2,790 ຕາກິໂລແມັດ. ຈະກວມເອົາ 5,163 ຕາກະໂລລາດຕະເວນ ແລະ ໃນນັ້ນຈະລວມເອົາ 03 ເຂດ​ບຸ​ລິ​ມະ​ສິດຊີ​ວະ​ນາໆ​ພັນ ເຂດ​ອະ​ນຸ​ລັກ​ພິ​ເສດ (SCA): (ແຜນທີ່ 01) ເຂດນີ້​ມີ​ລະ​ບຽບ​ການ​ຄຸ້ມ​ຄອງ​ຄື​ກັນ​ກັບເຂດ​ຄຸ້ມ​ຄອງ​ນຳ​ໃຊ້ ແຕ່​ຫ້າມ​ເດັດ​ຂາດບໍ່​ໃຫ້​ມີ​ການ​ລ່າ​ສັດປ່າ​ທຸກ​ຊະນິດ. ການກໍານົດເອົາສາມເຂດ​ບຸ​ລິ​ມະ​ສິດຊີວະນາໆພັນໃນ ເຂດອຸທິຍານແຫ່ງຊາດ ນາກາຍ-ນໍ້າເທີນ ແມ່ນອີງໃສ່ຜົນການວິເຄາະ ຄວາມອຸດົມສົມບູນທາງດ້ານຊີວະນາໆພັນ ແລະ ໄພຂົ່ມຂູ່ ທີ່ໄດ້ດໍາເນີນໃນລະຫວ່າງກອງປະຊຸມແຜນຍຸດທະສາດການບັງຄັບໃຊ້ກົດຫມາຍທີ່ຈັດຂຶ້ນ ໃນປີ 2016. ເຂດດັ່ງກ່າວນີ້ ກວມເອົາເນື້ອທີ່ລວມກັນປະມານ 700 ກມ² ອີງໃສ່ຂໍ້ມູນໃນໄລຍະຜ່ານມາ ແລະ ຄຳເຫັນຊ່ຽວຊານ, ເຂດດັ່ງກ່າວໄດ້ຖືກ​ກຳ​ນົດໃຫ້​ເປັນ​ເຂດ​ບຸ​ລິ​ມະ​ສິດ​ສຳ​ຄັນ​ອັນ​ດັບ​ສູງ ໃນການປົກປັກ​ຮັກ​ສາພາຍໃນ​ເຂດ​ປ່າ​ສະ​ຫງວນ ເນື່ອງຈາກວ່າ ຍັງມີ​ຊີ​ວະ​ນາໆ​ພັນອຸດົມສົມບູນ ​ທີ່​ມີ​ຄຸນ​ຄ່າ​ສູງ​ລວມ​ຢູ່​ໃນ​ນັ້ນ​ດ້ວຍ.
• ເຂດ​ບຸ​ລິ​ມະ​ສິດ​ຊີ​ວະ​ນາໆ​ພັນ1 (PBA1) ເຂດ​ທົ່ງ​ກະ​ແຈງ/ເຂດ​ນໍ້າ​ມອນ​ຕອນ​ເທິງ:

ເປັນ​ເຂດ​ບຸ​ລິ​ມະ​ສິດ​ ອັນ​ດັບສູງ​ສູດ ເນື່ອງຈາກມີຄວາມອຸດົມສົມບູນ ແລະ ຄວາມຫຼາກຫຼາຍ​ທາງ​ດ້ານ​ຊີ​ວະ​ນາໆ​ພັນ​ສູງສຸດ. ເປັນ​ເຂດ​ທີ່​ມີ​ຄວາມ​ສູງ​ຈາກ​ລະ​ດັບ​ນໍ້າ​ທະ​ເລ ມີປ່າດົງດິບຊຸ່ມຊື່ນ ເຊິ່ງມີແນວໂນ້ມວ່າອາດຈະຍັງມີ ​ເສົາ​ຫຼາ ຫຼົງເຫຼືອຢູ່ ແລະ ເປັນຖິ່ນທີ່ຢູ່ອາໄສຂອງປະຊາກອນ ນົກ​ວູ່​ວາວ ແລະ ເຫັງ​ນ​ຫາງ​ກ່ານ. ພ້ອມນັ້ນກໍ່ຍັງເຊື່ອວ່າເປັນພື້ນທີ່ ທີ່ລະດັບການໃສ່ແຮ້ວ ຫຼື ການລ່າປະເພດອື່ນໆແມ່ນຍັງຕໍ່າ ຍ້ອນເປັນ​ເຂດຢູ່ຫ່າງໄກ ສອກຫຼີກ ແລະ ບໍ່ສາມາດເຂົ້າເຖິງໄດ້ງ່າຍ.

• ເຂດບຸລິມະສິດຊີວະນາໆພັນ2 (PBA2) ເຂດ​ນໍ້າ​ແຈ/ຫ້ວຍ​ຕອງ/ຫ້ວຍ​ສະ​ນາບ:

ເຂດນີ້ເປັນເຂດພື້ນທີ່ຕຳ່ທີ່ມີລັກສະນະເປັນປ່າປະສົມ​ ແລະ ປ່າແປກ. ພື້ນທີ່ນີ້ເປັນ​ຖິ່ນ​ທີ່​ຢູ່​ອາ​ໄສສຳຄັນຂອງ​ຟານ​ເຂົາ​ໃຫຍ່ ແລະ ສັດ​ຕະກຸນລີງ​. ໃນ​ໄລ​ຍະ​ຜ່ານ​ມາ​ການ​ໃສ່​ແຮ້ວ​ແມ່ນ​ຢູ່​ໃນ​ລະ​ດັບ​ຕໍ່າ ແລະ ສ່ວນຫຼາຍ​ການ​ລ່າ​ສັດ​​ທີ່​ພົບ​ເຫັນໃນ​ເຂດນີ້​ແມ່ນ​ນຳ​ໃຊ້​ປືນ​.

• ເຂດບຸລິມະສິດຊີວະນາໆພັນ3 (PBA3) ເຂດ​ທົ່ງ​ກ້​ວາງ/ທົ່ງ​ແສດ:

ເຂດນີ້​ມີຖິ່ນ​ທີ່​ຢູ່​ອາ​ໄສ​ ແລະ ຄຸນ​ຄ່າ​ຂອງຊີ​ວະ​ນາໆ​ພັນ​ຄ້າຍ​ຄື​ກັນ​ກັບ​ເຂດ​ບຸ​ລິ​ມະ​ສິດ​ອັນ​ດັບ2 ແຕ່ມີເສັ້ນທາງທີ່ສາມາດເຂົ້າເຖິງໄດ້ງ່າຍຈາກຫວຽດນາມ, ສະ​ນັ້ນ​ເຂດດັ່ງກ່າວນີ້ ຈິ່ງເຮັດໃຫ້ເກີດມີ​ລັກ​ລອບລ່າສັດ​ຫຼາຍ. ຈຳນວນປະຊາກອນຂອງຊະນິດພັນທີ່ສໍາຄັນໄດ້ຖືກທໍາລາຍຢ່າງໜັກໜ່ວງ ແລະ ການສະ​ກັດ​ກັ້ນ​ເພື່ອຫລຸດຜ່ອນການລ່າສັດຈະເປັນບັນ​ຫາທ້າທາຍ​ທີ່​ສຸດໃນການຄຸ້ມຄອງ

• ເຂດຄຸ້ມຄອງນໍາໃຊ້. ເຂດ​ຄຸ້ມ​ຄອງ​ນຳ​ໃຊ້ (CUZ): ​​ເຂດນີ້ ອະ​ນຸ​ຍາດ​ໃຫ້​ລ່າ​ສັດໄດ້ບາງຊະນິດ ແລະ ເກັບກູ້ເຄື່ອງ​ປ່າ​ຂອງ​ດົງ,​ ແຕ່ບໍ່ອະນຸຍາດໃຫ້ດໍາເນີນກິດຈະກໍາດ້ານກະສິກໍາໄລຍະຍາວ ຫຼື ຂະໜາດໃຫຍ່. ບໍ່ໃຫ້ມີການຖ່າງປ່າເຮັດໄຮ່, ລ່າສັດຫວງຫ້າມ ແລະ ຕັດໄມ້ໃນເຂດດັ່ງກ່າວເດັດຂາດ. ອຸທິຍານແຫ່ງຊາດ ນາກາຍ-ນໍ້າເທີນ ມີເຂດຄຸ້ມຄອງນຳໃຊ້ທັງໝົດ 1,434 ກມ²ກວມເອົາ 974 ຕາກະໂລໃນການກວດກາລາດຕະເວນ.
• ເຂດເຊື່ອມຕໍ່. ແມ່ນເຂດທີ່ມີການທີມີການເຄື່ອນຢ້າຍຂອງສັດປະແຕ່ລະໆດູການ ເປັນບ່ອນເຊື່ອມຕໍ່ລະຫວ່າງປ່າສະຫງວນນີ້ກັບເຂດອື່ນ.
• ເຂດກັນຊົນ ເຂດ​ກັນ​ຊົນ: ເຂດນີ້ແມ່ນຢູ່ໃນໄລຍະ 100 ແມັດ ຂອງເຂດແດນທັງສອງຝາກ ລະຫວ່າງ ເຂດຫວງຫ້າມເດັດຂາດ ແລະ ເຂດຄຸ້ມຄອງນຳໃຊ້, ເຂດນີ້ບໍ່ໄດ້ມີການປັກປ້າຍ ແລະ ປະຊາຊົນທີ່ເຂົ້າມາໃນ ຫຼື ເຂົ້າໃກ້ເຂດດັ່ງກ່າວໂດຍບໍ່ໄດ້ຕັ້ງໃຈແມ່ນຈະຖືກຕັກເຕືອນ.