ກ່ຽວກັບ

  ກອງຄຸ້ມຄອງ ອຸທິຍານແຫ່ງຊາດ ນາກາຍ-ນໍ້າເທີນ ການຄຸ້ມຄອງແຫລ່ງນໍ້າເທີນ2 ແມ່ນຢູ່ພາຍໃຕ້ອົງການຄຸ້ມຄອງ ແລະ ປົກປັກຮັກສາແຫລ່ງນໍ້າເທີນ2 ຕາມດໍາລັດນາຍົກລັດຖະມົນຕີ ເລກທີ 25/ນຍ ລົງວັນທີ 26/2/2001 ແລະ ຕໍ່ມາດໍາລັດນາຍົກລັດຖະມົນຕີເລກທີ 471 ເດືອນພະຈືກ 2011 ການຄຸ້ມຄອງ ແລະ ປົກປັກຮັກສາແຫລ່ງນໍ້າເທີນ2 ໄດ້ມອບໃຫ້ແຂວງເປັນຜູ້ຄຸ້ມຄອງ ແລະ ປົກປັກຮັກສາໂດຍມີທ່ານເຈົ້າແຂວງໆຄໍາມ່ວນ ເປັນປະທານສະພາບໍລິຫານຄຸ້ມຄອງແຫລ່ງນໍ້າເທີນ2 ເຊີ່ງ ມີກອງເລຂາເປັນຜູ້ປະສານງານ ແລະ ຮ່ວມມືກັບໜ່ວຍງານຕ່າງໆກ່ຽວຂ້ອງຂອງເມືອງ. ຕໍ່ມາດໍາລັດເລກທີ 122/ນຍ ປີ 2017 ໄດ້ປ່ຽນປະທານສະພາບໍລິຫານຄຸ້ມຄອງແຫລ່ງນໍ້າເທີນ2 ຈາກເຈົ້າແຂວງຄໍາມ່ວນມາເປັນລັດຖະມົນຕີກະຊວງກະສິກໍາປ່າໄມ້ ແລະ ມີກອງຄຸ້ມຄອງອຸທິຍານແຫ່ງຊາດ ນາກາຍ-ນໍ້າເທີນ ເຮັດໜ້າທີ່ເປັນກອງເລຂາຈັດຕັ້ງປະຕິບັດຕາມແຜນການຄຸ້ມຄອງ ແລະ ປົກປັກຮັກສາແຕ່ລະໄລຍະ. ປະຕິບັດຕາມສັນຍາສໍາປະທານ 25 ປີ ທີ່ໄດ້ເຊັນໃນປີ 2002 ລະຫວ່າງ ລັດຖະບານ ສປປລາວ ກັບບໍລິສັດພະລັງໄຟຟ້ານໍ້າເທີນ2, ເຊິ່ງໄດ້ເລີ້ມກໍ່ສ້າງເຂື່ອນນັບແຕ່ປີ 2005 ເປັນຕົ້ນມາ ແລະ ໄດ້ຜະລິດກະແສໄຟຟ້າຂາຍໃນວັນທີ 3 ເມສາ 2010. ສັນຍາສໍາປະທານຈະໄດ້ສີ້ນສຸດໃນວັນທີ່ 30 ເມສາ 2035 ຕາມສັນຍາສໍາປະທານ ວິໄສທັດ: ອຸທິຍານແຫ່ງຊາດ ນາກາຍ-ນໍ້າເທີນໄດ້ຖືກຄຸ້ມຄອງ ປົກປັກຮັກສາ ຢ່າງມີປະສິດທິຜົນ ໃນການ ປົກປ້ອງຄຸນຄ່າທາງດ້ານຊີວະນາພັນ, ຮັກສາ ແລະ ເສີມຂະຫຍາຍລະບົບນິເວດທາງທຳມະຊາດ, ປົກປັກຮັກສາແມ່ນໍ້າ, ດິນ ແລະ ຊີວິດການເປັນຢູ່ຂອງປະຊາຊົນຜູ້ທີ່ຍັງເພິ່ງພາອາໃສຊັບພະຍາກອນທັງທີ່ຢູ່ພາຍໃນ ແລະ ອ້ອມຮອບເຂດອຸທິຍານໄດ້ຮັບການປັບປຸງໃຫ້ດີຂື້ນ. ເປົ້າໝາຍ: ການຄຸ້ມຄອງ, ປົກປັກຮັກສາ ແລະ ພັດທະນາ ເຂດແຫຼ່ງນໍ້າ ນ້ຳເທີນ 2 ແມ່ນເພື່ອຟື້ນຟູ, ບູລະນະ ແລະ ສົ່ງເສີມ ການອະນຸລັກ ຄຸນຄ່າດ້ານຊີວະນາໆພັນ ແລະ ຖິ່ນທີ່ຢູ່ອາໄສ ທາງທຳມະຊາດ ໄວ້ໃຫ້ຄຽງຄູ່ກັບຄຸນຄ່າທາງດ້ານວັດທະນະທໍາ ຂອງປະຊາຊົນ ໃນອຸທິຍານ ເພື່ອຮັກສາ ປະລິມານ ຂອງນ້ຳ ຢ່າງສະຫມໍ່າສະເຫມີ ແລະ ມີການຕົກຕະກອນຕ່ຳ ທັງໄຫລເຂົ້າ ແລະ ໄຫລອອກຈາກ ອ່າງເກັບນ້ຳ ນ້ຳເທີນ 2. ຈຸດປະສົງ: 1) ຮັກສາ ແລະ ເພີ່ມອັດຕາການປົກຫຸ້ມ ຂອງປ່າໄມ້ ໃນເຂດແຫຼ່ງນໍ້າ ນ້ຳເທີນ 2 ໂດຍເນັ້ນໃສ່ ການຟື້ນຟູ ປ່າແຄມນໍ້າ ແລະ ການນໍາໃຊ້ແບບຍືນຍົງ ຂອງລະບົບນິເວດແຄມນໍ້າ. 2) ຮັກສາ ແລະ ເພີ່ມຄວາມຫຼາກຫຼາຍ ທາງດ້ານຊີວະນາໆພັນ ແລະ ທີ່ຢູ່ອາໄສ ທີ່ສຳຄັນ ໂດຍສະເພາະ ປະຊາກອນ ຂອງຊະນິດສັດປ່າ ທີ່ຫາຍາກ ແລະ ໃກ້ຈະສູນພັນ. 3) ປັບປຸງຊີວິດການເປັນຢູ່ ຂອງປະຊາຊົນທ້ອງຖິ່ນ ທີ່ອາໃສຢູ່ພາຍໃນ ແລະ ອ້ອມຮອບ ເຂດແຫຼ່ງນໍ້າ ນໍ້າເທີນ 2 ໂດຍຮູບແບການພັດທະນາ ໂດຍຊຸມຊົນ. 4) ສ້າງຄວາມເຂັ້ມແຂງ ຄວາມອາດສາມາດ ຂອງອົງການ ແລະ ຂອງຄູ່ຮ່ວມ ເພື່ອຄຸ້ມຄອງ ເຂດແຫຼ່ງນໍ້າ ນໍ້າເທີນ 2 ໃຫ້ຍືນຍົງ.

ການຈັດຕັ້ງ:

ໂຄງປະກອບການຈັດຕັ້ງ ກອຊ.ນທ ຕາມແຜນພັດທະນາສັງຄົມ ແລະ ສິ່ງແວດລ້ອມຄັ້ງທີ່ 4 (SEMFOP4) ໄດ້ກໍານົດອອກເປັນ 2 ກຸ່ມວຽກໃຫຍ່ ເຊັ່ນ:  ກຸ່ມວຽກບໍລິຫານ ແລະ ການການເງີນ ແລະ ກຸ່ມວຽກວິຊາການ  ໃນນັ້ນ ມີ 2 ໜ່ວຍງານຄື:  ໜ່ວຍງານອະນຸລັກ (ຄົ້ນຄວ້າ ແລະ ຕິດຕາມຊີວະນາໆພັນ ແລະ ບັງຄັບໃຊ້ກົດຫມາຍ) ແລະ ໜ່ວຍງານພັດທະນາ (ປັບປຸງຊີວີດການເປັນຢູ່, ທອງທ່ຽວ ແລະ ໂຄສະນາເຜີຍແຜ່). ໃນກຸ່ມວີຊາການຍັງມີ 6 ຫ້ອງການເຂດເຊັ່ນ: ຫ້ອງການຍ່ອຍເຂດນາວາງ, ຫ້ອງການຍ່ອຍເຂດທ່າໄຜ່ບ້ານ, ຫ້ອງການຍ່ອຍເຂດເຕີງ, ຫ້ອງການຍ່ອຍເຂດອ້ອມຮອບຄໍາເກີດ, ຫ້ອງການຍ່ອຍເຂດຫົວພູ-ນາຕານ ແລະ ຫ້ອງການຍ່ອຍເຂດຍົມມະລາດ-ລັງຄັງ. ໂຄງຮ່າງການຈັດຕັ້ງ: ປະກອບມີ ຄະນະກໍາມະການບໍລິຫານ ອຸທິຍານແຫ່ງຊາດ ນາກາຍ-ນໍ້າເທີນ 15 ທ່ານ. ພະນັກງານວິຊາການ 74 ຄົນ.  

ຂໍ້ມູນຕິດຕໍ່:

ເບີໂທຕິດຕໍ່ໍ່ຫ້ອງການ: +856(0)5121233 ຕ້ອງການຈອງ/ອີເມວ: ທີຢູ່: ອຸທິຍານແຫ່ງຊາດນາກາຍ-ນ້ຳເທີນ ບ້ານ ອຸດົມສຸກ, ເມືອງ ນາກາຍ ແຂວງ ຄຳມ່ວນ, ສປປ ລາວ